Nepali Lekh Rachana - Kanchi Ko Yaadma Bhaujulaai Chithi

Tweet

कान्छीको यादमा भाउजूलाई चिठी

भाउजू, तपाईंको पत्र पाएँ । हाम्रो मायाका बारेमा जान्ने इच्छा गर्नुभएको रहेछ । तपाईंलाई थाहै छ म कान्छी भनेपछि कति माया गर्थें । कान्छीको माया पनि तपाईंले देख्नुनै भएको थियो । उनको मायाको सीमा नै थिएन । तर के गर्नु भाउजू जहाँ धेरै माया हुन्छ त्यहाँ बिछोडले खाडल जमाएको हुँदोरहेछ । थाहा पाउनु भो भाउजू कान्छीले अर्कोसँग बिहे गरिछे । मेरो माया बुझ्न सकिन मेरो पनि दुख्ने मुटु थियो, रुने आँखा थिएन, झर्ने आँसु थियो । लडाइँमा हारेको सिपाहीझैँ घाइते बनाएर गई । हो तपाईंले भनेका वाणीहरू आज मेरो कानमा फनफन गर्दै घुमिरहेका छन् । हो तपाईंले सत्य भन्नुभएको थियो 'पुरुषको भाग्य र महिलाको विश्वास कहिल्यै नगर्नु' भनेर । हो भाउजू, बुढो लाहुरेले सजाएर राखेको रुमाल जस्तो उनको तस्बिर सजाउनुबाहेक अरू कुनै उपाय छैन ।

भाउजू, तपाईंलाई थाहै छ कान्छीलाई एकदिन नदेख्दा पानी खान नपाएर छट्पटिएको मृगझैँ त्यो दिन छट्पटिएर बित्थ्यो । तर आज म कसरी बाँचिरहेको छु मलाई नै थाहा छैन । भाउजू, म त्यो अतीत सम्झन पनि सक्दिनँ, अनि बिर्सन पनि सक्दिनँ ।

तर कान्छीले बिहा गरेपछि पनि सुख नपाएको कुरा मैले सुनेँ । पोइले सधैँ रक्सी खाई कान्छीमाथि नराम्रो व्यवहार गर्छ रे । अहिले त कान्छीलाई घरबाट निकालिदिएर अर्की स्वास्नी लिई बसेको छ रे । मानिसको माया कस्तो हुन्छ भाउजू कोही कान्छीका लागि रातदिन तड्पिएर मर्नतयार छ कोही कान्छीलाई तड्पाएर मार्न तयार छ । कान्छीमाथि ममा कहिले घृणा थिएन बरु माया झन् बढ्दै गयो । लोग्नेले घरबाट निकालेपछि कान्छीको अत्तोपत्तो केही छैन रे, विचरा साह्रै दुःख पाई अहिले कहाँ होली कान्छी ?

भाउजू, कान्छीलाई तपाईंले सपनामा होस् वा विपनामा होस् चाहे कल्पनामै किन नहोस् जहाँ भेट्नुभए पनि भनिदिनु होला आज पनि तिमीलाई जीवनले पर्खिरहेको छ । हो भाउजू, कान्छीले अर्कैसँग बिहा गरेर गए पनि मेरो लागि अझै ऊ पवित्र नै छे । उनको आशमा बाँचिरहेको छु । ल त भाउजू उही तपाईंको अभागी देवर ।

Source :- Saptahik